ହେ ବନ୍ଧୁ
ହେ ବନ୍ଧୁ
1 min
233
ବନ୍ଧୁ ପରି ବନ୍ଧୁଟିଏ ତୁମେ
ଆହେ ଜଗବନ୍ଧୁ,
ମୁଁ ତ ଦରିଆଟିଏ
ତୁମେ ମହାସିନ୍ଧୁ l
ଦ୍ରୌପଦୀର ସଖା ତୁମେ
କୋଟି ବସ୍ତ୍ର ଦେଲ,
ଦରିଦ୍ର ସୁଦାମା ପାଶେ
ନିଜେ ସେବା କଲ l
ଧର୍ମକ୍ଷେତ୍ରେ ପାର୍ଥ ରଥେ
ସାରଥୀ ସାଜିଲ,
ପାପ ପୁଣ୍ୟ ଦୁଇ ଭାଷା
ଶ୍ରୀମୁଖେ କହିଲ l
ବନ୍ଧୁ ପଣେ ତୁମ ଠାରୁ
କିଏ ଯିବ ବଳି,
ସୁଗ୍ରୀବର ବନ୍ଧୁ ହୋଇ
ନିପାତିଲ ବଳି l
ହସ୍ତିନା ଭୁବନ ଦିନେ
ବନ୍ଧୁପଣେ ଯାଇଥିଲ,
ଶାଗ ଭଜା ବିଦୁରର
ଖୁସିରେ ଖାଇଲ l
ଶୁଣ ପ୍ରଭୁ ହୃଷୀକେଶ
ବାରେ ମୋ ଜଣାଣ,
ମହୀ ତଳେ ରହି ଅଛି
ତୁମ ବଡ଼ପଣ l
ସୃଷ୍ଟି କର ଭ୍ରାତୃଭାଵ
ବନ୍ଧୁତାର ଡୋରି,
ଶାନ୍ତି, ମୈତ୍ରୀ, ବନ୍ଧୁ ଭାବ
ହୃଦୟେ ସବୁରି l
ବିନା ସ୍ଵାର୍ଥେ ପ୍ରୀତି ରହୁ
ବନ୍ଧୁର ହୃଦରେ,
ହାତ ମୁଠା ଶକ୍ତ ହେଉ
ବନ୍ଧୁର ପଥରେ l