ହାଟ

ସାତ ଦିନେ ଥରେ ବସିଥାଏ ହାଟ

କେଉଁଠି ବା ଦୁଇ ଥର

କେତେ ରକମର କିଣାବିକା ହୁଏ

କାହାକୁ ନ ଥାଏ ତର ।

କୁଲା ବାଉଁଶିଆ, ପ୍ଲାଷ୍ଟିକ୍ ଦରବ

ଖଟ,ପିଢା ଆଉ ଶିକା 

ପନିପରିବା ଠୁଁ ଲୁଗାପଟା ଯାଏ

ସବୁ ହୁଏ ସେଠି ବିକା

ନିଜ ଦରବର ଗୁଣଗାନ କରି

ଡକା ପାରନ୍ତି ବିକ୍ରେତା

ମୂଲଚାଲ କରି ଭଲମନ୍ଦ ଦେଖି

କିଣୁଥାନ୍ତି ସବୁ କ୍ରେତା ।

ହାଟୁଆ ବାଟୁଆ ଯେଝା ବାଟେ ଯିଏ

ଯାଇଥାନ୍ତି ନିଜ ଘର

ହାଟର ସଂପର୍କ କିଛି କ୍ଷଣ ପାଇଁ

ସମସ୍ତେ ଏଠାରେ ପର ।

କିଛି ସମୟର କୋଳାହଳ ପରେ

ନୀରବତା ଯାଏ ଛାଇ

ଅପେରା ସରିଲେ ଯାତ୍ରା ପେଣ୍ଡାଲଟା

ମାରୁଚି ସତେ କି ହାଇ ।