ଗୁରୁଦେବ ନମସ୍ୟ

ଗୁରୁ ଜ୍ଞାନ ଦାତା ପଥ ପ୍ରଦର୍ଶକ

ବ୍ରହ୍ମା ବିଷ୍ଣୁ ମହେଶ୍ୱର ।

ଗୁରୁ ପରଂବ୍ରହ୍ମ ଜ୍ଞାନର ଆଲୋକ

ସାକ୍ଷାତ ପରମେଶ୍ୱର ।୧।

ଜ୍ଞାନ ଗନ୍ତାଘର ଦୟାର ସାଗର

ସ୍ନେହ ଶ୍ରଦ୍ଧାର ଝରଣା ।

ହୃଦୟ ତାଙ୍କର ପ୍ରେମର ମନ୍ଦିର

ନାହିଁ ଛଳ ପ୍ରତାରଣା ।୨।

ଜ୍ଞାନ ଆଲୋକରେ ଅଜ୍ଞାନ ତମସା

ଅନ୍ତରରୁ ଦୂର କରି ।

ବିବେକ ବିଚାର ହୃଦେ ଶିଷ୍ଟାଚାର

ଦେଇଥାନ୍ତି ଗୁରୁ ଭରି ।୩।

ଯୁଗେ ଯୁଗେ ଗୁରୁ ଶିଷ୍ୟ ପରମ୍ପରା

ସଂସାରରେ ପ୍ରଚଳିତ ।

ଗୁରୁ ବିନା କେହି ଜ୍ଞାନ ପାଇନାହିଁ

ଗୁରୁଦ୍ରୋହ ମହାପାପ ।୪।

ଆଦ୍ୟଗୁରୁ ମାତା ପିତା ହିଁ ଅଟନ୍ତି

ଦ୍ଵିତୀୟରେ ଶିକ୍ଷାଦାତା ।

ତୃତୀୟରେ ଦୀକ୍ଷାଗୁରୁଙ୍କର ସ୍ଥାନ 

ଦିଅନ୍ତି ଈଶ୍ୱର ଦୀକ୍ଷା ।୫।

ବିଶ୍ୱ ବ୍ରହ୍ମାଣ୍ଡରେ ସକଳ ପିଣ୍ଡରୁ

ଭିନ୍ନ ଭିନ୍ନ ଶିକ୍ଷା ମିଳେ ।

ସର୍ବେ ଗୁରୁ ଶିଷ୍ୟ ପ୍ରକାର ଭେଦରେ

ପୂଜ୍ୟ ଗୁରୁ ସଦାବେଳେ ।୬।

ଗୁରୁ ଗୁଣମୁକ୍ତ ଗୁରୁ ନିରାକାର

ଅନ୍ଧାରେ ଆଲୋକ ଶିଖା ।

ଗୁରୁଙ୍କ କୃପାରେ ସର୍ଵ ସିଦ୍ଧି ହୁଏ

ଈଶ୍ୱର ଦିଅନ୍ତି ଦେଖା ।୭।

ଗୁରୁଙ୍କ ଚରଣେ ଲୟ ରଖିଥିଲେ

ସାଧନାରେ ମିଳେ ସିଦ୍ଧି ।

ସମସ୍ତ କର୍ମରେ ସଫଳତା ମିଳେ

ଗୀତାରେ ବର୍ଣ୍ଣିତ ବିଧି ।୮।

ବିଷ୍ଣୁ ଅବତାରେ ବ୍ୟାସଦେବ ଜନ୍ମ

ପରାଶର ଔରସରୁ ।

ଆଷାଢ଼ ମାସର ପୂର୍ଣ୍ଣିମା ତିଥିରେ

ସତ୍ୟବତୀଙ୍କ ଗର୍ଭରୁ ।୯।

ବ୍ୟାସଦେବଙ୍କର ଜନମ ଦିବସ

ଦିନଟି ଗୁରୁ ପୂର୍ଣ୍ଣିମା ।

ଗୁରୁଙ୍କ ପୂଜାରେ ଶୁଭ ଫଳ ମିଳେ

ଲଭି ଗୁରୁଙ୍କ ମହିମା ।୧୦।