ଗରୀବର ଜୀବନ

କମାଲେ ଖାଏସନ୍ ନାଇହେଲେ

ଭୁକେ ସୁଇ ପଡସନ୍,

ଗରିବର୍ କଥା କହେମି ଆଏଜ୍

କେତେ ଭଲ୍'ଲୋକ୍ ଥିସନ୍ ।

ସବୁଦିନର୍ ଟା ସବୁଦେନେ ସର୍'ସି

ଯାହା ପଏସା କମାସନ୍,

କିଏ ଦେଖିଛେ କାଏଲ୍ ଦିନ୍'କେ

ହେ କଥା କହୁଥିସନ୍ ।

କେଭେ ନାଇଁଥାଏ ଭେଦଭାବ୍ ତାକର୍

ମନ୍ ସବୁବେଲେ ପଏର୍'ଛା,

କୁନୁଆଁ ଯଦି କିଏ ଘର୍'କେ ଆଏଲେ

ବଡା କରସନ୍ ଖର୍'ଚା ।

ନାଇଥାଉ ପାସେ ପଛେ ପଏସା କଉଡ୍

ବେଭାର୍ ବନେ ଦେସନ୍ ,

କୁନୁଆଁ ଆଏଲା ବନ୍ଧୁକେ ଭଗବାନ୍ ଲେଖେ

ସରାଗେ ପୂଜା କରିଥିସନ୍ ।

ଦୁଃଖର୍ ସମିଆଁଥି ସବୁବେଲେ ପାଖେରହି

ସେବା, ଯତନ୍ କରସନ୍,

ଭାବର୍ ଡୋରି ତାକର୍ କେଭେ ନାଇଁ ଛିଡେ

ମୁନୁଷ୍'କେ ମୁନୁଷ୍'ଲେଖେ ଦେଖସନ୍ ।

ହକ୍ କମାସନ୍, ହକ୍ ମାଗସନ୍ ତାକର୍

କାହାକେ କେଭେ ନାଇଁ ଡରତ୍,

ତାହାକୁ କିଏ ଖରାପ୍ ବେଭାର୍ ଦେଖାଲେ

ସେଟାକେ ନାଇଁ ଛାଡତ୍ ।

ଗରିବର୍ ମନ୍ ସଫା କାଚର୍ ଦରପନ୍

ମଏଲା ନାଇନ ଟିକେ,

ତାର୍ ପେରେମର୍ ମିଠା ମହନୀ

ସମ୍'କର୍ ଠାନେ ରୁକେ ।