ଗଢିବା ଆମରି ହାତେ

ଆସ କୁନା ମୀନା କରନାହିଁ ମନା

ଚାଲ ଯିବା ପାଠ ପଢି

ଦେଶ ବିଦେଶର ଜାଣିବା ଖବର

ଆଗକୁ ପାରିବା ବଢି ।

ଗୁରୁଜୀ ଗୁରୁମା ଆମ ବାପା ମାଆ

କରିବା ଚରଣ ପୂଜା

ସେନେହ ବନ୍ଧନେ ମରତ ଭୁବନେ

ଉଡାଇବା ଜ୍ଞାନ ଧ୍ବଜା ।

ଭେଦଭାବ ଶୂନ୍ୟ ଅଟେ ସେହି ସ୍ଥାନ

ଯହିଁ ଭାରତୀଙ୍କ ବାସ

ଜ୍ଞାନ ପ୍ରଦୀପରେ ଆଲୋକ ବିଛୁରେ

ତମସାର ହୁଏ ନାଶ ।

ସେନେହରେ ମାଳି ଗଢେ ଛୋଟ କଳି

ଆଦର ଯତନ କରି

ନିଜର ସାଇତା ଯେତେ ଅଭିଜ୍ଞତା

ଦେଇଥାଏ ସେଥେ ଭରି ।

ଆମ ବାସସ୍ଥାନ ଏ ବିଶ୍ବ ଭୁବନ

ଗଢିବା ଆମରି ହାତେ

ସରସ ସୁନ୍ଦର କରିବା ରାଇଜ

ଦେଇ ଶ୍ରମ, ଘର୍ମ ଯେତେ ।