ଏଇତ ଜୀବନ

ଯାହା ହାତ ଧରି ଚାଲି ଶିଖାଇଲି

ଦୁନିଆରେ କଲି ବଡ

ପାଠ ପଢାଇଲି ଶିକ୍ଷିତ କରିଲି

ତା ଲାଗି ଆଜି ମୁଁ ଜଡ ।

ହାଡଭଙ୍ଗା ପରି -ଶ୍ରମ କରି କରି

ଉଦର ଜ୍ବାଳାକୁ ସହି

ସଂସାରରେ ତାକୁ ଦେଲି ପରିଚୟ

ଗଧ ପରି ବୋଝ ବୋହି ।

ତନୁରେ ତା କନା ଉଦରରେ ଦାନା

ମଥାନେ ଦେଲି ମୁଁ ଛାତ

ବୃଦ୍ଧ କାଳେ ମୋର ଜଷ୍ଟି ସେ ନୋହିଲା

ଛାଡି ଚାଲିଗଲା ହାତ ।

ପୁରୁଣା ଠିକଣା ଛାଡି ବାଟବଣା

ନୂଆ ଠିକଣାରେ ବାଇ

ମୋତେ ବୋଝ ବୋଲି ମନରେ ବିଚାରି

ଗଲା ବୃଦ୍ଧାଶ୍ରମ ନେଇ ।

ପରିଚୟ ହୀନ ଆଜି ମୋ ଜୀବନ

ବୃଦ୍ଧାଶ୍ରମେ ମୋର ବାସ

ଭଲରେ ସଂସାର କରୁ ମୋ ସନ୍ତାନ

ପାପ ଯାଉ ତା'ର ନାଶ l