ଦୁର୍ଗାଙ୍କ ଦୁଖ

ମା’ ଆସିଥିଲେ କଲିକତା ବୁଲି ମାଡି ଆସିଲେ ଓଡିଶା

କଟକେ ଛଟକ ଦେଖି ଦୁର୍ଗାଙ୍କର ଉଡିଗଲା ସତେ ହଂସା ।

ଚାନ୍ଦନୀଚୌକରୁ ଚାଉଳିଆଗଂଜ ସିଂହ ବାହନରେ ଚଢି

ବୁଲିଗଲେ ମା' ବୁଝି ପାରିଲେନି ଖରଚ ଯାଉଛି ବଢି !!

ସୁନା ଚାଂଦି ମେଢ ସୁନାର ମୁକୁଟ ତୋରଣ ଦିଗବାରେଣୀ

ବିଜୁଳି ବତିର ସାଜସଜା ଦେଖି ଚମକିଲେ ଶିବପତ୍ନୀ ।

ଖରଚ ଭରଣା କରିବା ପାଇଁ କି ସାହିରେ ଚାନ୍ଦା ଜୁଲମ

ମୋଟା ଅଙ୍କ ଚାନ୍ଦା ଦେବନାହିଁ ଯଦି ହବ ଉତ୍ତମ ମଧ୍ୟମ ।

ରାଜଧାନୀ କଥା ନିଆରା ଭାବିକି ଟପିଗଲେ କାଠଜୋଡି

ଝାରପଡା ଠାରୁ ପାତ୍ରପଡା ଯାଏ ତୋରଣ ଧାଡିକି ଧାଡି ।

ବୁଦ୍ଧେଶ୍ୱରୀ କାଳେ ପଛେ ପଡିଯିବ ସୁଦୃଶ୍ୟ ତୋରଣ ଅତି

ଶହୀଦ ନଗର ସବୁଠୁ ଆଗରେ ନୟାପଲ୍ଲୀ ସମଗତି ।

ନବମୀରେ ହୁଏ ରାବଣ ପୋଡିଟି ମନ୍ତ୍ରୀ ଧନୁଶର ମାରେ

କୋଟି ରାବଣଠୁ ବଳି ପାପୀ ଯିଏ ଧର୍ମଧ୍ୱଜା ସିଏ ଧରେ।

ଭଷାଣୀ ଦିନର ନିଆରା ଉତ୍ପାତ ନାକେଦମ୍ ପ୍ରଶାସନ

ପୂଜା ପାଠ ସିନା ପରିବେଶ ଗଢେ ବଢେ ଏଠି ପ୍ରଦୁଷଣ ।

କଟକ ଚଣ୍ଡୀଙ୍କୁ ଡାକି ବୋଇଲେ ମା' କାହିଁ ବସିଛ ମଉନି

ମ୍ଳେଛ ସଂହାରଣ ପାଇଁ ଅବତାର ପଡିଲ କିଂପାଇ ତୁନି ।

ଚଣ୍ଡୀ କହୁଛନ୍ତି ଗଡଚଣ୍ଡୀ ସାଥେ ମସୁଧା କରୁଛି ମୁହିଁ

ଗୋଟିଏ ମହିଷା ମାରିଥିଲ ଆମେ ନପାରୁ ମିଶିକି ଦୁଇ ।

ଜଗନ୍ନାଥ ଠାରେ ଗୁହାରୀ କରନ୍ତୁ ହେବେ କଳ୍କି ଅବତାର

ହାତଗୋଡ ନାହିଁ ବସିଛନ୍ତି ଆଖି ପତା ନପଡେ ତାଙ୍କର ।

କଳି କାଳ ଏତ ଦେବତା ନିରସ୍ତ୍ର ନୁହଁ ତୁମ ସତ୍ୟଯୁଗ

ଆସୁରିକ ଶକ୍ତି ପ୍ରବଳୁ ପ୍ରବଳ ଶେଷ କର କଳିଯୁଗ ।

ବିଶ୍ୱେଶ୍ୱର ମାଝୀ