ଦୀପାବଳୀ ପର୍ବ

ଦୀପାବଳୀ ପର୍ବ

ଆମ ଏ ଭାରତେ କୁସଂସ୍କାର ଯେତେ

ରହିଛି ପିଲାଏ ଶୁଣ

ଗୋଟିଗୋଟି ଭାବି ବଖାଣ କରିବି

ଦୀପାବଳୀ ପର୍ବ ଗୁଣ ।

କାରଣ ସହିତେ ବୁଝିବା ପରତେ

ଖଟାଇ ନିଜର ମଥା

ଭଲ ମନ୍ଦ କରି ତଉଲିବା ବାରି

କହିବି ଯେତେକ କଥା ।

ବିଜ୍ଞାନ ସମ୍ମତ କାରଣ ଅଛି ତ

ଧରମ କଥାକୁ ଛାଡି

ଯେତେକ ପରବ ଅଛି ସେ ସରବ

ଅବାଟେ ଗଲାଣି ମାଡି ।

ପତଙ୍ଗ ଓ କୀଟ ହୁଅନ୍ତି ପ୍ରକଟ

ବର୍ଷା ଦିନେ ହୋଇ ଜାତ

ବଢନ୍ତି ଜୀବାଣୁ ରୋଗର ଭୂତାଣୁ

ବ୍ୟାପିଯା'ନ୍ତି ଦେହ ହାତ ।

ଶରତ ଆସିଲେ ଖରାକୁ ପାଇଲେ

ମରିଥାନ୍ତି କିଛି ଆପେ

ଦୀପାବଳି ଦିନ କଲେ ଦୀପ ଦାନ

ଝାସ ଦେଇଥାନ୍ତି ତାପେ ।

ବିଜୁଳି ଆଲୋକ ସବୁ ନିରର୍ଥକ

ଯେତେକ ସଜାଉ ଆଜି

ମିଛ ଆଡମ୍ବରେ ଫୁଟାଉ ବିଭୋରେ

ବାଣ ଓ ଆତସବାଜୀ ।

ସରେ ଯେତେ ଧନ ପୂରିଥାନ୍ତା ଅନ୍ନ

ଭୋକିଲା ଉଦରେ କେତେ

ଭାବି ଦେଖ ପିଲେ ବାଣ ଫୁଟାଇଲେ

କ୍ଷତି ହେଉଥାଏ ଯେତେ ।

ଘଟେ ଦୁର୍ଘଟଣା ସବୁ ଜଣାଶୁଣା

ଅଗ୍ନିକାଣ୍ଡ ଚାରି ଆଡେ

ଦେଶର ସମ୍ପତ୍ତି ବଦଳେ ବିପତ୍ତି

ପ୍ରଦୂଷଣେ ଡର ମାଡେ ।

ରୋଗ ଶ୍ବାସଗତ ବଢଇ ବହୁତ

ବୁଢାବୁଢୀ ଶିଶୁ କଷ୍ଟ

ହେଉ ଜାଗରଣ ନ ଫୁଟାଅ ବାଣ

ହେଜିନିଅ ଯେତେ ନଷ୍ଟ ।

ପିଠାପଣା ଖିରି ଖାଅ ମନ ଭରି

ପୂଜିଣ ଭବାନୀ କାଳୀ

ସରବେ ହରଷେ ଦୀପକ ପ୍ରଦୋଷେ

ବିଶ୍ବହିତେ ଦିଅ ଜାଳି ।

ପ୍ରସନ୍ନ କୁମାର ମାଦଳା

ଘର ନଂ - ଏଫ୍ / ୧୩

ସେକ୍ଟର - ୪

ରାଉରକେଲା - ୭୬୯୦୦୨

ଦୂରଭାଷ - ୭୯୭୮୧୯୨୨୨୭