ବୁଝାମଣା

ଜୀବନ ସହ ବୁଝାମଣା କରି ନେଇଛି ମୁଁ ,

କଣ ବା ଆଉ କରି ପାରି ଥାଆନ୍ତି ଯେ ? ?

କେତେବେଳେ ସେ ମୋ ସହ ଲୁଚକାଳି ଖେଳୁଛି ତ ,

ଆଉ କେବେ ଉଠା ପକା ଖେଳ ।

କେବେ ଜୀବନଟା ତା ହାତରେ ଜହ୍ନକୁ ଧରି ,

ଜୋଛନାର ମୋତି ମୋ ଚାରି ପାଖେ ବୁଣି ଦେଉଛି ,

ଆଉ କେବେ ସପନ ଦୋଳିରେ ମୋତେ ଝୁଲାଇବା ଲାଗିଛି ।

ଆଉ ମୁଁ ?

ମୁଁ ବି ସେ ଜୋଛନାକୁ ଗୋଟାପଣେ ମୋ ଦେହରେ ମାଖି ,

ଏକ ସୁନ୍ଦର ଶୀତଳତାର ସୁଖଦ ଅନୁଭୂତିକୁ ନିଜର କରି ନେଇଛି ,

ସପନ ଦୋଳିରେ ଝୁଲି ଝୁଲି ଆକାଶକୁ ଛୁଉଁଛି ଭାବି ,

ନୟନରେ ଆଶାର ଆଲୋକ ଦେଖିଛି ।

ହେଲେ ଜୀବନ ପୁଣି କେତେବେଳେ ,

ଜହ୍ନକୁ ମେଘ ଆଢୁଆଳେ ଲୁଚାଇ ଦେଉଛି ,

ଆଉ ଅନ୍ଧାର ସବୁ ମୋ ଦେହେ ଗୋଟାପଣେ ନେସି ଦେଉଛି ,

ଅବା ଆଉ କେବେ ସପନ ଦୋଳିରୁ ମୋତେ ଠେଲି ଦେଉଛି ,

ମୁଁ କେତେ ବେଳେ ମୋ ଦେହର ମେଞ୍ଚା ମେଞ୍ଚା ଅନ୍ଧାରକୁ ଦେଖୁଛି ,

ଆଉ କେବେ ଶୂନ୍ଯ ଆଖିରେ ଆକାଶକୁ ଚାହିଁ ରହିଛି ।