ବର୍ଷା ତୁମେ

ବର୍ଷା ତୁମେ ଏଇ ଆଷାଢ଼ ଆକାଶର

ଅଭିମାନ ତ ନୁହଁ !

ଏମିତି ଅବେଳରେ ବର୍ଷି ଯାଉଛ ଯେ.....!

ବର୍ଷା ତୁମେ ଭସା ବାଦଲର

ପଣତ ତ ନୁହଁ !

ମନଟାକୁ ଏମିତି ଛୁଇଁ ଦେଇ ଯାଉଛ ଯେ...।

ବର୍ଷା ତୁମେ ମୋ ଅଗଣାର 

ଘୁଙ୍ଗୁର ତ ନୁହଁ !

ମିଛଟାରେ ଛମ୍ ଛମ୍ ନାଚି ଯାଉଛ ଯେ....।

ବର୍ଷା ତୁମେ ସେଇ ଚପଳ ଚିତ୍ରକାରର

ଆଧୁନିକ ଚିତ୍ରକଳା ତ ନୁହଁ

ଏମିତି ଅବୁଝା ରହି ଯାଉଛ ଯେ..।

ବର୍ଷା ତୁମେ କେଉଁ କବିର

ଅବାସ୍ତବ କଳ୍ପନା ତ ନୁହଁ !

ଏମିତି ନିମିଷକେ ମିଳେଇ ଯାଉଛ ଯେ....।

ବର୍ଷା ତୁମେ ପଥହୁଡ଼ା ପଥିକର

ଅଙ୍କାବଙ୍କା ପାଦ ଚିହ୍ନ ତ ନୁହଁ !

ପାନ୍ଥଶାଳାର ଚାରିକାନ୍ଥ ପରେ ଏମିତି ଅଦୃଶ୍ୟ ହେଉଛ ଯେ....।

ହେଲେ ବର୍ଷା ତୁମେ ମୋ ପାଇଁ

ସେଇ ସ୍ଵର୍ଗୀୟ ଭାବନା

ଭାବମୟ କାମନା ଆଉ

କମନୀୟ ଯାତନା

ତୁମ ଅପେକ୍ଷାରେ ଦ୍ରବୀଭୂତ ହୁଏ,

ସିକ୍ତ ହୁଏ , ସନ୍ତାପିତ ହୁଏ......।।