ଭଲ ଅମଳ ପାଇଁ

ତୁମକୁ ହତାଦାର କରି 

ଡେଇଁ ପଡ଼େ ସେ 

ମଦ ମାଂସର ଭୋଜି ଖାଇବାକୁ ।

ନିଶାରେ ମସଗୁଲ୍ ହୋଇ 

ଗିଲାସେ ପରେ ଗିଲାସେ 

ନିଜ ରକ୍ତର ଫୁଟନ୍ତା ମଦ ପିଇଚାଲେ 

ତାହା ସହ ଚିରି ଖାଇଚାଲିଥାଏ 

ଦେହର କଞ୍ଚାମାଂସକୁ ।

 

ନା , ବହୁତ ହୋଇଗଲା , 

ରାତି ଅନ୍ଧାରଟା ମଉଳିବାକୁ ଲାଗିଲାଣି 

ଆଉ ଥରେ ସୂରୁଜ ଉଁଇବା ପୂର୍ବରୁ 

ତାକୁ ଖୋଜି ପାଇବାକୁ ହେବ ।

ଗୋଟି ଗୋଟି କରି ତୃଷ୍ଣାର 

ମଞ୍ଜିଗୁଡ଼ାକୁ ଚିହ୍ନିବାକୁ ହେବ , 

ଜାଣିବାକୁ ହେବ ତାଙ୍କର ରୂପରଙ୍ଗକୁ 

ଆଉ ଗଜା ଧରିବାର ସଠିକ୍ ପାଗକୁ ।

 

ତା' ହତାଶବୋଧର 

ସବୁ ବାଳୁଙ୍ଗା ଗୁଡ଼ାକୁ ବି ବାଛିବାକୁ ହେବ 

କାମନା ଧାନର ଭଲ ଅମଳ ପାଇଁ ।

ସେ ବ୍ଯାପିଯିବ ପୃଥିବୀ ସାରା 

ସମସ୍ତଙ୍କୁ ଖାଇ ହଜମ କରି

କ'ଣ ହେବ ଶେଷରେ ,

ତୁମେ କେଉଁଠି ଥିବ ସେବେ ?

ଦେହ ଭିତରେ ରକ୍ତ ମାଂସ ହୋଇ

ନା ଶୁଷ୍କ ମରୁଭୂମିରେ ମରୀଚିକା ରୂପେ ?

ତୁମକୁ ହତାଦର କରି...