ଭକ୍ତି ମିଶିଗଲେ
ଭକ୍ତି ମିଶିଗଲେ
ଭକ୍ତି ମିଶିଗଲେ ଭୋଜନ ସହିତ
ଖାଦ୍ୟ ପ୍ରସାଦରେ ଗଣା
ଅଳ୍ପ ବହୁତରେ ଫରକ ପଡେନି
କେବେ ବି ହୁଏନି ଉଣା ।
ପେଟ ହେଲେ ଖାଲି ଖାଦ୍ୟ ଆବଶ୍ୟକ
ନାମଟି ଯାହାର ଭୋକ
ଖାଦ୍ୟ ପ୍ରତି ସ୍ପୃହା ଜନ୍ମ ନେଇ ମନେ
ଆତ୍ମା ହୁଏ ଛଟପଟ ।
ଭକ୍ତି ସହକାରେ ଭୋକରେ ରହିଲେ
ନାମ ତା'ର ଉପବାସ
ଖାଦ୍ୟ ପ୍ରତି ସ୍ପୃହା ମନେ ଜାଗେନାହିଁ
ଆତ୍ମାକୁ ମିଳେ ସନ୍ତୋଷ ।
ଦୈନନ୍ଦିନ କର୍ମେ ଭ୍ରମଣ କରିଲେ
ସମସ୍ତେ କହନ୍ତି ଯାତ୍ରା
ଭକ୍ତି ଭାବଧରି ଯାତ୍ରା ଅରମ୍ଭିଲେ
କହିଥାନ୍ତି ତୀର୍ଥଯାତ୍ରା ।
ସଙ୍ଗୀତ ସହିତ ଭକ୍ତି ଯୋଗ ହେଲେ
ଭଜନ ଜଣାଣ ନାମ
ଭାବରେ ଭଜିଲେ ଭଗବାନ ପ୍ରାପ୍ତି
ମାନବ ଜୀବନ ଧନ୍ୟ ।
ଗୃହ ମଧ୍ୟେ ହୃଦେ ଭକ୍ତି ଜାତ ହେଲେ
ଗୃହଟି ମନ୍ଦିର ସମ
ଶାନ୍ତି ସୁଖ ସଦା ରହେ ସେହି ଗୃହେ
ଦୂର ହୋଇ ସବୁ ଭ୍ରମ ।
କର୍ମ ସମ୍ପାଦନେ ଭକ୍ତି ଭାବ ଥିଲେ
ତାକୁ ହିଁ କହନ୍ତି ସେବା
କାହିଁପାଇଁ ଆମେ ସେବାର ଆଳରେ
କର୍ମରୁ ବିଚ୍ୟୁତ ହେବା ।