ବେଳ ହେଲା ରତରତ

ସବୁ ସମ୍ମାନିତ ବୟସ୍କ ଜନଙ୍କୁ

ସାଦର ଅଭିନନ୍ଦନ

ଆସନ୍ତୁ ଜାଣିବା କିଛିଟା ଲକ୍ଷଣ

ବୟସାଧିକ ପ୍ରମାଣ ।

ଘରୁ ବାହାରକୁ ଯିବା ପାଇଁ ବେଶୀ

ବଳୁ ନାହିଁ ଯଦି ମନ

ଜାଣନ୍ତୁ ବାର୍ଦ୍ଧକ୍ୟ ହେଲା ଉପନୀତ

ଇଚ୍ଛା ଶକ୍ତି ଅବସନ୍ନ ।

ପ୍ରିୟ ସାଙ୍ଗ ବନ୍ଧୁ କଲେ ନିମନ୍ତ୍ରଣ

ପାଟି ହୁଏ ଖନଖନ

ରହିଛି ଜରୁରୀ କାମ ବୋଲି ଦିଅ

ବାହାନାର ଉପକ୍ରମ ।

ଭଲ ଦାମୀ ଖାଦ୍ୟ ଖାଇଲେ ବାହାରେ

ଘର ଖାଦ୍ୟ ମନେପଡେ

ମଉଜ ମସ୍ତିର ଚଳଚ୍ଚିତ୍ର ଦେଖି

ବିରକ୍ତି ଓ ଚିଡା ମାଡେ ।

ନୁଆ ନୂଆ ବସ୍ତ୍ର କ୍ରୟ ପରିଧାନେ

ନ ଥାଏ ମନେ ଆଗ୍ରହ

ଘୂରେ ନାହିଁ ମନ ପ୍ରଜାପତି ପରି

ଘାରେ ମନେ ପତ୍ନୀ ମୋହ ।

ଫୁଲର ସୁଗନ୍ଧ ମଧୁର ମହକ

ମଧୂପର ଗୁଞ୍ଜରଣ

ସନ୍ଦର୍ଶନେ ଯଦି ପ୍ରେମ ସୁଧାନିଧି 

ନ ହୁଏ ଛାନ୍ଦ ସ୍ମରଣ ।

ଜାଣନ୍ତୁ ଆସନ୍ନ ଜୀବନ ସାୟାହ୍ନ

ବେଳ ହେଲା ରତରତ

ବିଶ୍ରାମ ଏକାନ୍ତ ଅଟେ ଆବଶ୍ୟକ

ଦେହ ମନ ଶ୍ରାନ୍ତ କ୍ଲାନ୍ତ ।

ଆଚାର ବିଚାରେ ରଖ ନିୟନ୍ତ୍ରଣ

ହୁଅ ସ୍ୱାସ୍ଥ୍ୟ ଯତ୍ନଶୀଳ

ବୟସ୍କଙ୍କ ପକ୍ଷେ ସ°ଯମତା ଶ୍ରେୟ

ଜଣାଉଛି ନମସ୍କାର ।