ଅକ୍ଷୟ ତୃତୀୟା

ତିଥି ଅନୁକୂଳ, ଯାତ୍ରା ଅନୁକୂଳ

            ସର୍ବ ଅନୁକୂଳ ସିଦ୍ଧି,

ବଇଶାଖ ମାସ ଶୁକଳ ପକ୍ଷ ର

           ପବିତ୍ର ତୃତୀୟା ତିଥି....||

ଅନେକ ପରବ ରହିଅଛି ଆମ

           ଓଡ଼ିଆ ସଂସ୍କୃତି ଟିରେ,

ପୁରୁଷାନୁକ୍ରମେ ପାଳିଆସୁଛନ୍ତି

           ସର୍ବେ ହରଷ ମନରେ...||

ବଳରାମ ଆଉ ରେବତୀ ବିବାହ

          ହୁଏ ଆଜ ଦିନେ ଜାଣ,

ସୂର୍ଯ୍ୟଦେବ ଆଜି ଯୁଧିଷ୍ଠିର ହସ୍ତେ

         ଅକ୍ଷୟ କଳସ କଲେ ଅର୍ପଣ...||

କୃଷକ କରଇ ଅନୁକୂଳ କ୍ଷେତେ

           ଆରମ୍ଭିବ କ୍ଷେତ କାମ,

ଜଗନ୍ନାଥ ଙ୍କର ଯାତରା ନିମନ୍ତେ

          ଆରମ୍ଭ ରଥ ନିର୍ମାଣ ର କର୍ମ...||

ବିବାହ ବ୍ରତ ଓ ଗୃହ ପ୍ରବେଶ ର

         କାର୍ଯ୍ୟ ହୁଅଇ ସମ୍ପର୍ଣ୍ଣ,

ବେପାର ବାଣିଜ୍ୟ ସର୍ବ ଶୁଭ କାର୍ଯ୍ୟର 

          ଅନୁକୂଳ ଏହି ଦିନ...||

ପର୍ଶୁରାମ ଙ୍କର ଜନମ ଦିବସ

          ଶିରୀମନ୍ଦିରେ ଚନ୍ଦନ ଯାତ,

ବୃନ୍ଦାବନେ ବାଙ୍କ ବିହାରୀ ଙ୍କ ପଦ

          ଦର୍ଶନ କରନ୍ତି ଭକ୍ତ....||

ସୂର୍ଯ୍ୟ ଓ ଚନ୍ଦ୍ରମା ଉଚ୍ଚ ରାଶି ଟିରେ

         ହୁଅନ୍ତି ଅବସ୍ଥାପିତ,

ଦାନ ଧର୍ମ ଆଦି ଶୁଭ କର୍ମ କଲେ

         ହୁଅଇ ସୌଭାଗ୍ୟ ପ୍ରାପ୍ତ....||

ମହାଭାରତ ର ଗ୍ରନ୍ଥ ର ଆରମ୍ଭ

          କରିଥିଲେ ବେଦବ୍ୟାସ,

ଏହିଦିନ ଗଙ୍ଗା ଧରାପୃଷ୍ଠେ ଅବତରି

          ଦେଇଥିଲେ ଆଶୀର୍ବାଦ...||

ଦେବୀ ଦୁର୍ଗା ଯୁଦ୍ଧେ ମହିଷାସୁର କୁ

          ପରାଜୟ କରିଥିଲେ,

ନାନା ପୁଣ୍ୟ କାର୍ଯ୍ୟ ଏହି ଦିବସ ରେ

         ହୋଇଥିଲା ଜାଣ ଭଲେ....||

ଅତୀବ ପବିତ୍ର ଦିବସ ଓ ତିଥି

          ଅଟଇ ଅକ୍ଷୟ ତୃତୀୟା,

ଭକ୍ତି ଭାବନା ରେ ପୂଜିଲେ ପ୍ରଭୁଙ୍କୁ

          ମିଳିଥାଏ ତାଙ୍କ ଦୟା....||