ଆଉ କି କହିବ

ହଜାଇ ଦେଲୁକି  ସବୁ ତୁ ଠିକଣା 

    କରାଇ ମୋତେ ତୁ ବନ୍ଦୀ 

କି ମାୟାରେ ତୁହି  ମାୟାବିନୀ ହେଲୁ 

    କାହା ପ୍ରେମେ ହୋଇ ଛନ୍ଦି ll 1

  

ଅପରାଧ ମୋର  କି ଅବା ଥିଲା ଯେ 

    ଫିଙ୍ଗିଲୁ ଜନମ ଦେଇ 

ପୂତିଗନ୍ଧମୟ   ଅଳିଆଗଦାର 

    ଆବର୍ଜନା କୁଣ୍ଡେ ଥୋଇ ll 2

     

ଦୁନିଆରେ ମୋର  ପିତାମାତା ଥାଇ 

    କଲୁ କାହିଁ ଅନାଥିନୀ 

ତୁ ପରା ଜନନୀ   ଦୁର୍ଗତିନାଶିନୀ 

     କିମ୍ପା ହେଲୁ ହୀନିମାନି ll 3

    

ଆଜି ନ ହେଲେ ବି କାଲି ଏ ଦୁନିଆ 

    କହିବ ଆଙ୍ଗୁଳି ଠାରି 

କି କଲୁ କି କଲୁ   ଅପବାଦ ଡରେ 

    ଜନନୀତ୍ବ ଦେଲୁ ମାରି ll 4

     

ନିମିଷକ ପରେ  ବିଲୁଆ କୁକୁର

    ଖାଇବେ ମୋତେ କାମୁଡି 

ବଞ୍ଚି ଥାଉଥାଉ  ଦୁନିଆ ଆଗରେ 

    ଲୁଚାଇ ଦେଲୁ ଫୋପାଡି ll 5

    

ମାଆ ହୋଇ ଯଦି  ଏପରି କରିଲୁ 

      କେମିତି ବଞ୍ଚିବୁ ଏକା 

ଜନନୀ  ହୋଇ ତୁ  ମୋ ମଥାରେ କିଆଁ 

     ଦେଲୁ କଳଙ୍କର ଟୀକା ll 6

     

ଭୂଲି ଗଲୁ ସ୍ନେହ  ମମତା ମୟୀର

     ନାରୀ ତୁ ସୃଷ୍ଟି କାରିଣୀ 

ଆଉ କି କହିବ  ଏ ଦୁନିଆ ତୋତେ 

    ଜାୟା, ଭଗିନୀ, ଜନନୀ ll 7