ଆମରି ନେତା
ଆମରି ନେତା
ଆମରି ନେତା ଚିକ୍କଣ କଥା
ପାଣିରେ ପଡେ ସର
ମାମୁଁ ପୁଅ କି ପିଉସୀ ପୁଅ
ସତେକି ପରା ନିଜର ।
ଟିକଟ ପାଇଁ ତେଲ ମାଲିସ
ଭୋଟ ପାଇଁ କୁକୁର
ପାଇଲେ ଭୋଟ ଦେଖିବ ନାଟ
ସଭିଏଁ ହୋନ୍ତି ଚୋର ।
ପାଟିଟା ତାଙ୍କ ସାଗର ଭଳି
ଦାନ୍ତ ଲୁହାଠୁଁ ଟାଣ
ପେଟଟା ଭାରି ସୁରୁଜ ଭଳି
ଉଠଇ ହୁତାଶନ ।
ଗୋଡ ଦୁଇଟା ନଈ ପାଣିର
ପ୍ରଖର ଜଳ ସ୍ରୋତ
ଅଟକା ପାଠ ନୁହଇ ଚାଟ
ଫିଟାଇ ଦିଏ ବାଟ।
ହାତ ଦୁଇଟା ରାବଣ ହାତ
ଲୁଚି ରହିଛି କେତେ
ଯା ମୁଣ୍ଡେ ସେହି ହାତ ରଖଇ
ଶିବଙ୍କ ବର ପ୍ରତେ ।
ଆଖିଟି ତାଙ୍କ ଅଗ୍ନିଠୁଁ ତେଜ
କଳାକୁ ଧଳା କରେ
ବିରୁଦ୍ଧେ ଗଲେ ଚାହିଁ ସେ ଦେଲେ
ଜୀବନ ମାଟି କରେ ।
ତାଙ୍କ ଭେଜାଟି କମ୍ପ୍ୟୁଟରଟି
ସବୁ ଫିଡିଙ୍ଗ ଥାଏ
କେଉଁଠି କେଉଁ ମନ୍ତର ଭାଉ
ଲାଗିଲେ କାମ ହୁଏ ।
କଥାଟି ତାର ପାଣିର ଗାର
ମୁହୂର୍ତ୍ତେ ରହେ ନାହିଁ
ଲୁଟି ଖାଇବା ତାଙ୍କର ଧର୍ମ
ସମସ୍ତେ ଥାନ୍ତୁ ଚାହିଁ ।
ସମ୍ମାନ ତାର ଉଚ୍ଚ କୋଟିର
ଭିତର ଅଟେ ଫମ୍ପା
ଧୋବଲା ବେଶ ଚିକ୍କଣ ଦେଖ
ମିଛରେ ଅନୁକମ୍ପା ।
ଖାଆନ୍ତି ଲୁଟି ଖାଦାନ ଖଣି
ରାସ୍ତା ଘାଟ ଗଡିଆ
ଇନ୍ଦିରା ବାସ ମଳ ନିବାସ
ସବୁ ତା ପେଟେ ଥୁଆ ।
ଗୋଡ଼ି ପଥର କ୍ଷଣିକେ ତାର
ପେଟେ ହଜମ ହୁଏ
ଆଇନ ଯାଏ ଆଇନ ବାଟେ
ଫାଇଲ ସବୁ କୁହେ ।
ଧରି ପାରେନି ତାଙ୍କୁ ଆଇନି
ହାତଟି ତାଙ୍କ ଲମ୍ବା
ଟଙ୍କାରେ ବନ୍ଧା ମୁହଁରେ ଛେଦା
ବଡ ପୁରୋଧା ଅବା ।