ଆମେ ପାଲଟିବା ଆକାଶ ରାଜା

ଯାଦୁ ଦେଖାଉଛି ସେଇଠି ସନା ,

ଶୂନ୍ୟରେ କେମିତି ବସିଛି ଅନା ।

ବାଇନାକୁଲର ଧରିକି ହାତେ ,

କଅଣ କଅଣ ଦେଖୁଛି ଏତେ !!

ତା' ବାପାଠୁ ଇଏ କୁହୁକ ଶିଖେ ,

ଟିକେ ରହ,ମୁହିଁ ଡେଇଁକି ଦେଖେ ।

କଡେ଼ଇ ଭିତରେ କଅଣ ଅଛି ,

କେଉଁ ମନ୍ତ୍ର ଇଏ ଜପ କରୁଛି !!

କେମିତି ରହିଛି ଶୂନ୍ୟରେ ଝୁଲି ,

ଆମକୁ ବି ଟିକେ ଚାହୁଁନି ବୁଲି ।

କହୁଥିଲେ ଭାଇ-'କୁହୁକ ଯାହା ,

ଚମତ୍କାର-ହାତ ସଫେଇ ତାହା ।

ତୁମେବି ଚାହିଁଲେ ପାରିବ ଶିଖି ,

ଖୁସି ହେବେ ଲୋକ ଖେଳକୁ ଦେଖି ।

ତୁମେ ଆଜିକାର ବିଜ୍ଞାନ ଛୁଆ ,

ଉଦ୍ୟମ କରିଲେ ଶିଖିବ ନୂଆ ।

ଯଦି ନିଷ୍ଠା ଆଉ ଆଗ୍ରହ ଥାଏ ,

ଅସମ୍ଭବ ପରା ସମ୍ଭବ ହୁଏ ।'

ଚନ୍ଦୁରା,ଆଜିଠୁ ମିଶିକି ଆମେ ,

ପାଠ ପଢ଼ା ସହ ଲାଗିବା କାମେ ।

ଖେଳ କସରତ କରିବା ନିତି ,

କାଲି ଭଳି ଦିନ ଯିବରେ ବିତି ।

ବାୟୁସେନା ପାଇଁ ପରୀକ୍ଷା ଦେବା ,

ନିଶ୍ଚିତ ଭାବରେ ସଫଳ ହେବା ।

ଆକାଶେ ଉଡ଼ିବା ବିମାନେ ବସି ,

ଦେଶର ସୁରକ୍ଷା କରିବା ହସି ।

ଯାଦୁ ଖେଳଠାରୁ ଆହୁରି ମଜା ,

ଆମେ ପାଲଟିବା ଆକାଶ ରାଜା ।