ଆହେ ବଂଶୀଧାରୀ
ଆହେ ବଂଶୀଧାରୀ
![](https://cdn.storymirror.com/static/1pximage.jpeg)
1 min
![](https://cdn.storymirror.com/static/1pximage.jpeg)
24
ମଥୁରା ପୁରରେ ଜନମ ଲଭିଲ
ଗୋପରେ ବଢିଲ ଯାଇ
ଗୋପ ବାଳ ସଙ୍ଗେ ଲୀଳାଖେଳା କଲ
ଚରାଇଣ ପ୍ରଭୂ ଗାଈ ।
ଗୋପୀ ଗୋପାଳଙ୍କ ଅସୀମ ସ୍ନେହରେ
ଲାଳିତପାଳିତ ହେଲ
ଖୁସିରେ ପାଗଳ ନନ୍ଦ ଯଶୋମତୀ
କରୁଥିଲେ ନିତି ଗେଲ ।
ତିନି ଦିନ ପାଇଁ କଣ୍ଟ କରି ପ୍ରଭୂ
ମଥୁରାକୁ ଗଲ ବୁଲି
କଂସ ବଧ କଲ ଦ୍ବାରକା ସ୍ଥାପିଲ
ଗୋପ ପୁର ଗଲ ଭୁଲି ।
ଯମୁନା ପୁଳୀନ ବଇଁଶୀର ସ୍ବନ
ଝୁରୁଚି ତୁମକୁ ଆଜି
ରାଈକିଶୋରୀଙ୍କ ପ୍ରୀତିର କଦମ୍ବ
ଡାଳ ଯାଇଅଛି ଭାଜି ।
ଆହେ ବଂଶୀଧାରୀ ଆସ ବାରେ ଫେରି
କରିଦିଅ ଦୁଃଖ ଦୂର
ମନ ବୃନ୍ଦାବନେ ହୃଦ କୁଞ୍ଜବନେ
ଭରିଦିଅ ବଂଶୀ ସୁର ।