वृक्षारोपण वसा

    वृक्षवल्लरीचे जीवनी महत्त्व मानवा, 

    जाणता तू राहिलासी अजाण रे कसा ?

    अविरत वृक्षतोड करी निर्दयी दानवा ,

     विसरला रे अनंत त्यांचे उपकार असा ?

    बकाल,उदास केलीस रे तूच ही सृष्टी ,

    बांधून बंगले,शहरे बागायत रानावरी. 

    सत्ता पैसा येता अंध झाली रे तव दृष्टी,

    ओढवून घेतला तू विनाश,ये भानावरी .

    प्रदुषण वाढता निसर्ग चक्र बदलले.

    ऋतूचक्र बदलता पाऊस लहरी झाला .

    जपत राहता स्व स्वार्था तुझे चोचले ,

    विसरलास रे पर्यावरण संतुलनाला.

     वृक्षच देती सर्वां छाया नि फळे रसदार .

     मूळ,खोड,पाने फळे साली औषधी फार .

     महती तयाची वदती ऋषि,मुनी,वारंवार ,

     ग्रंथ,पुराणे,वेद, शास्त्र ही धन्वंतरी आधार .

   

    घेता वृक्षारोपण वसा,देऊ पर्यावरणा भार,

    लावू तुळस, लिंब, बेल नि पिंपळ डेरेदार. 

    संकल्प आता,पळवून लावूया सारे आजार, 

    ठेवून स्वच्छ अंगण परिसर ,आनंदी घरदार .