ती बिझीच असते आजकाल जरा

ती बिझीच असते आजकाल जरा

तिच्याच विश्वात दंग वगैरे

वावर असतो फक्त तिचा भोवती

सोबत आता जाणवत नाही

मोजकंच बोलणं होत आणि

स्पर्श होतात तेही अनोळखी

नातेवाईकांसमोर हसरे चेहरे

एकमेकांकडे पाहणं होतही नाही

आठवते मग ती संध्याकाळ

जणू काही कालच घडलेली

या सात वर्षांची घडी

नकळतच उलगडलेली

हाच तो समुद्र किनारा

जिथे पहिल्यांदा भेटलो होतो

नकळत झालेल्या स्पर्शांना

आम्ही दोघेहि भुललो होतो

आधी प्रेमाच्या शपथा मग

लग्नाच्या गाठीत अडकलो

एकमेकांना समजण्याआधीच

एकमेकांच्या बेड्या मात्र बनलो

आता शब्द म्हणजे भांडण

आणि भांडण म्हणजे अबोला

हे टाळण्यासाठी मग उरतो फक्त

बिझी असण्याचा एकच बहाणा