पहिली ओळ

असं ठरवून लिहिता आलं असतं

तर कितीतरी आणि कायकाय

लिहिलं असतं

सुटत असताना गाठ

तिचं एक टोक तरी घट्ट

धरता आलं असतं

पण असं ठरवून काही

आठवत नाही

नेमक्या वेळेला ते

टोकही सापडत नाही

अशावेळी मग उगाच

का गिरवायचं

खोटंखोटं पाणी

डोळ्यांत का अडवायचं

म्हणून राहू द्यायचं आपण

आपल्या मनाला शांत

शोधू द्यायचा त्याला

त्याचाच एखादा प्रांत

फिरताना तिथे जर

झाला आठवणींचा कल्लोळ

झिरपेल तेव्हा कागदावर

कवितेची पहिली ओळ