तिचं मन

माझं मन सांगतंय तिचं मन 

आता माझ्याकडे येत आहे 

माझ्या अंतरीच्या भावनांना 

ती सिरियसली घेत आहे ||0||

कधी भिती वाटलीच नाही 

मला तिला गमावण्याची 

कधी स्पर्धा केलीच नाही 

तिच्या हृदयात मावण्याची 

तिच्या हृदयाशी माझ्या हृदयाचा 

संपर्कच आता थेट आहे

माझ्या अंतरीच्या भावनांना 

ती सिरियसली घेत आहे ||1||

तीच आहे या आसमंतात 

तिचाच आभास चराचरात 

तीच सतत असते सोबत 

तीच हृदयात तीच अंतरात 

हा रोमँटिक वाराही तिच्या

सुगंधाची आठवण देत आहे

माझ्या अंतरीच्या भावनांना 

ती सिरियसली घेत आहे ||2||

असं कसं होऊ शकतं 

माझं प्रेम तिला कळणार नाही 

जरासंही हृदय तिचं 

माझ्यासाठी हळहळणार नाही 

जिथे बघतो तिथे तिचा 

काहीतरी संकेत आहे 

माझ्या अंतरीच्या भावनांना 

ती सिरियसली घेत आहे ||3||

आता एकटं वाटत नाही 

तिचं अस्तित्व जाणवतं 

एक कोवळं स्वप्न मला 

प्रत्येक क्षणी खुणावतं 

असं वाटतं जशी ती 

घट्ट माझ्या कवेत आहे 

माझ्या अंतरीच्या भावनांना 

ती सिरियसली घेत आहे ||4||

तिची आठवण सुखद आहे 

तिचा विरह जोडतो मला 

तोडत नाही कधी मला 

तिच्याकडे ओढतो मला 

स्पर्शून जातोय मला आता 

तिचाच श्वास हवेत आहे 

माझ्या अंतरीच्या भावनांना 

ती सिरियसली घेत आहे ||5||