तारेवरची कसरत

मन ओळखण्या मना

मुक नजरेची वाणी

तिच्या स्त्रीत्वाची कहाणी//धृ//

घट सृजनाचा हाती 

बीज अंकुरे कुशीत,

विश्व उद्याचे लपले

बघा धरेच्या मुशीत,

विश्वासचे गोड पाणी

तिच्या स्त्रीत्वाची कहाणी//१//

उपजत लाभलेली

दुरदृष्टी प्रज्ञा बुद्धी,

बळी देते भावनांचा

पाणी भरे रिद्धि सिद्धि,

सारे माने तेव्हा राणी

तिच्या स्त्रीत्वाची कहाणी//2//

ममतेची वात्सल्याची

अनमोल प्रेमभेट,

नाही उजवली कुस

जग म्हणती वांझोट,

कशी देवाची करणी

तिच्या स्त्रीत्वाची कहाणी//3//

घरदार मुलंबाळ

सासु सासरे नवरा,

परिवार सर्वकाळ 

रातदिन हे आवरा,

काळ चाले भांडीधुणी

तिच्या स्त्रीत्वाची कहाणी//4//

भोग कधी न सरती

कसरत तारेवरी,

काम नौकरी करती

हाती शस्त्रे दुर्गा परी,

नाही करत गाऱ्हाणी

तिच्या स्त्रीत्वाची कहाणी//5//

तिच्या वाचून निरस

निरर्थक हे जगणे,

करू नको रे वल्गना

तुज एकचि मागणे,

झेप घेऊ दे गगनी

तिच्या स्त्रीत्वाची कहाणी//6//