सुनबाई

आली आली सुनबाई

लक्ष्मीचे पाऊले घेऊन

होते दारातच उभी मी

स्वागताला पंचारती घेऊन।

टाकल्या फुलांच्या पायघड्या

लख रोषणाई प्रकाश दिव्याचा

झाली गोळा सगळे शेजारी

चेहरा बघण्या माझ्या लक्ष्मीचा।

दारी माप मी ठेवले ये तू

ओलांडून सोन्याच्या पावलाने

उखाणा घेता लेवकाच्या नावाचा

कान टवकारले घरातल्या भिंतीने।

नणंद तुझी आहे मैत्रिणीसारखी

गुजगोष्टी कर तीस मनातल्या

पित्यासमान आशीर्वादाचा हात

डोक्यावरी तुझ्या सासऱ्यांचा।

प्रत्येक गोष्ट मी तुला नवीन

घरातली समजून सांगेन

आहे आई समान मी तुझ्या

घे गोजिरवाणे घर माझे सांभाळून