सृष्टीचे हिरवे सौंदर्य --मृदगंध पावसाचा

बहरून गेला निसर्ग सारा

लागली चाहूल वर्षाऋतूची

सृष्टी सजली नववधूसारखी

आस तिला त्या प्रिय सख्याची

येई पाऊसराजा वाजतगाजत

मेघांच्या अश्वावर स्वार होऊनी

हिरवा शालू नेसुनी वसुंधरा

स्वागतास सज्ज लाज लाजूनी

सृष्टीला साज चढे नवा

येता रिमझिम सरी पावसाच्या

दरवळे मृदगंध मनामनात

चहुकडे भास हिरव्या लावण्याचा

बळीराजाच्या आनंदाला नसे पारावर

समृद्धीने डूले त्याचे शेतशिवार

करुनी धनधान्याची तो सोय

जगतास द्याया नवा उभार

सुखावले प्राणिमात्र, आनंदले चराचर

पावसाच्या सरींनी शहारले अंग

रोमारोमात संचारे नवा आनंद

नव्या अंकुरानी सृष्टी होई दंग

झाला निसर्ग हिरवा,नभी आले इंद्रधनू

अवनीवर अवतरे दुसराच स्वर्ग जणू

रंग चढला मेहंदीला,पावसाच्या धुंद सरींनी

मृदगंध सारा मनात राहिला भरुनी

हिरवीगार शेते डोलू लागली आनंदने

शेतकरी सुखावला, कष्ट करी जोमाने

डोंगराच्या कुशीतून, जलप्रपात येई खाली

शुभ्र दुधाळल्या पाण्यात मने चिंब चिंब झाली

पावसाच्या वर्षावाने धरती लाजली

भविष्याची बीजे नवी तिच्या कुशीत रुजली

मृदगंध पसरला चौफेर चराचरात

पावसाने रुजवली नवी स्वप्ने उरात