शिशिर ऋतु जादू

शिशिर जादू

चांफा पिवळा झाला बोडका

बूच कुंपणी फुले थोडका

पक्ष्यांची फांदींवर धाड कां

नीलमोहोर बरा रोडका -१-

शिरीष फुले टपटपली

पिंपळ पाने लपलपली

ओल धरे सालींची खपली

अवेळी सर रपरपली -२-

फुलपाखरू पंखी मंथर

स्पर्श लाजरी हो नवथर

दवबिंदू हळवे अंतर

प्राजक्त फुले तळी अंथर -३-

गवत फुलांना आली ओंबी

खारींची चाले चंचल झोंबी

वडपारंबींची लोंबालोंबी

मुरल्या मातीची रग कोंबी -४-

केली ही जादू ऋतुस्पर्शाने

पुलकित हो मन हर्षाने

भेटे निसर्ग विध रूपाने

जीवनचक्र अपकर्षाने -५-