राधा निघाली शाळेला

राधा निघाली शाळेला

(सांग सांग भोलानाथ)

कान्हा : सांग सांग राधे राधे

     शाळेत येणार का?

     शाळेमध्ये येऊनि

     वर्गात बसणार का?

राधा: काय सांगू कान्हा तुला

     भीती मला वाटे

     लांब छडी पाहुनच

     डोळ्यांत पाणी दाटे

     माझी ही व्यथा कोणी

     समजून घेईल का?

     सांग सांग कान्हा मी

     कशी येऊ शाळेला?।।

कान्हा : उरली ना शाळेत 

      आता कसली भीती

      गुरूजी आणि बाई

      मुलांसवे गाती

      छान गोड गाणी

      तूही गाणार का?।।

      सांग सांग............

राधा : पुस्तके नाहीत मला

     अन् गणवेष नाही

     तशी आले शाळेत जर

     रागावतील ना बाई

     हेड सरांकडे माझी

     तक्रार जाईल का?

     सांग सांग कान्हा.......

कान्हा :मोफत पुस्तके अन्

     आहार मिळतो ताजा

     खेळ सारे खेळताना

     येते भारी मजा

     मार तर मुळीच नाही

     आता तरी हसणार का?।।

     सांग सांग............

राधा : गणिताचे अंक किती!!!

     पुस्तकात मोठे धडे

     वर्गात बसून बसून

     कंटाळवाणे वाटे गडे

     खेळायची हौस माझी

     कधी पूरी होईल का?।।

      सांग सांग...............

कान्हा : खेळ,गाणी,गप्पा,गोष्टी

      मैदानावर होते मस्ती

      रंगीबेरंगी चित्रे खूप

      उपक्रमांशी कर दोस्ती

      सहलीची मजाच भारी

      क्षेत्रभेटीस येणार का?।।

      सांग सांग.................

राधा : खरंच की रे कान्हा

     आता बदलली शाळा

     तुझ्यासारखा मलाही

     लागेन तिचा लळा

     येऊ दे मलाही आता

     हसत हसत शाळेला।।

     थांब थांब कान्हा

     मला येऊ दे रे शाळेला.