नाते बहीण भावाचे

असे अतूट प्रेमाचे

नाते बहीण भावाचे

युगा पासून गाजते

प्रेम एक दुसऱ्याचे

एका आईच्या उदरी

जन्म दोघेही घेतात

थोडे रुसवा फुगवा

कधी खेळ खेळतात

जाते बहीण भावाची

लग्न होऊन सासरी

भाऊ कावरा बावरा

सुनी  वाटते ओसरी

श्रावणाच्या पुनवेला

रक्षा बंधन सणाला

भेट बंधूची घ्यायला

ताई  येते माहेराला

धागा राखीचा प्रेमाने

ताई बांधते भावाला

भावासाठी दीर्घायुष्य

सुख मागते देवाला