मृगाचा पाऊस

आला पावसाळा ऋतु

बहरली तरु - फुले

होड्या पाण्यात सोडून

खेळतात सान मुले ||१||

आली शिवारात स्वारी

पावसाचे गीत गाते

रानी पावसाची धून

पोशिंद्याचे असे नाते ||२||

थेंबांचाही टप - टप  

सुटे मोकाटही वारा

दामिनीही कडाडली

अंगणात वेचू गारा ||३||

इंद्रधनू लपंडाव

पाखरांचा घुमे नाद

गुंजारव भ्रमरांचा

निसर्गाशी घाली साद ||४||

भिजुनिया चिंब होता

नववधू जशी नटे

शालू हिरवा नेसून

धरा अंबराला भेटे ||५||

आला मृगाचा पाऊस

ऋतू हिरवा बरवा

घुमे झाडात पारवा

असे हवेत गारवा ||६||