मृदगंधित सुटले वारे.....

   ( चाल : भले बुरे ते घडून गेले......)      

      निळे नभ ते भरून आले,      

      अंधारून ते गेले सारे .      

      घुसमटलेल्या मनात कारे ,      

      सुसाट सुटले वादळ वारे ...॥ धृ ॥          

       भिरभिरते वरून खाली, 

       पाचोळ्या सह वादळ वारे. 

       मनात माझ्या खद खदणारे, 

       पक्षी वृक्षी चुळबुळती रे...॥ १ ॥

       

       मेघ नभी गर्जत आले, 

       घेऊन आले थेंब टपोरे. 

       धडधड ती उरात का रे, 

       गेले भिजवून चिंबच सारे..॥२॥           

       चंचल चपला चमकून गेली, 

       गेले तम ते उजळून सारे .      

       दचकून उठते अशी का रे ,      

       अंगावर उठती तरल शहारे..॥३॥      

       मेघ सारे बरसूनी गेले ,  

       अंगणी गारा, शुभ्र तारे.  

       जुळून येता स्वरही सारे,  

       मृदगंधित सुटले वारे.....॥४ ॥