मन वढाय वढाय

इथे देहाच्या मंदिरी

वसे आत्मा निरंतर

मन वढाय वढाय

चित्तचोर तो चकोर

चित्तशुद्धी साठी जरी

देह भजनात रंगे

भिरभिरे इथे तिथे

मन कुणाच्या हो संगे?

मूर्ती देवाची पाहता 

जडे मनामध्ये भक्ती

मन राहिले घरात

इथे सुटेना आसक्ती

प्रश्न कठीण पडता

कोडे बुद्धीला ते पडे

शीण डोक्याचा घालवी

मन जरी जवापाडे

जग अथांग सागर

त्यात डोह किती तरी

परी मनाची उमेद

नेई कशी पैलतीरी

मन वढाय वढाय

त्रस्त बुद्धिरुपी फौजी

सोडुनिया सारे आता

मी ही झाले मनमौजी