माय मराठी

माय मराठी ही माझी

तिचा बाळ मी तान्हा

माझा पिंड रे पोसला

पिऊनी शब्दरूपी पान्हा

माझ्या मायेचे असेरे

रूप अती मनोहर

खुळविती रूप तीचे

मात्रा, वेलांटीचे अलंकार

थोर लेखक, साधू संत

इथे निर्मिती साहित्य

नवोदित इथे तिची

सेवा करतात नित्य

पसरली लेकरे तिची

दाही दिशांना चौफेर

माय मराठीचा झेंडा

नेला तयांनी अटकेपार

अशी थोर माय माझी

काय वर्णू तिची शान

माझ्या मराठी बोलीचा

मज वाटतसे अभिमान