माझी जीवनशाळा
माझी जीवनशाळा
श्रेष्ठ दानाने मिळाले मला लक्ष्मीचे वरदान
ज्ञानदानाचा वसा म्हणू की असे विद्यादान
चिमुकल्यांकडून मिळाला नेहमीच सन्मान
प्रेम आदराचे तर भरभरून मिळते वाण
लहान झाल्यासारखं वाटतं त्यांच्या भोवती
विद्यार्थ्यांचं समाधान हिच आमुची पावती
शिकवताना घडता नि घडवता आलं मला
शिक्षण एक शास्त्र म्हणू की सहज कला
याच नोकरीतून शिकता येते मनाची भाषा
नवी पिढी फुलताना पाहून फुलत जाते आशा
शिक्षक भासतो जणू एक कुंभाराचा आवा
त्यांची बोबडी बोली की वाजे कृष्णाचा पावा
शिक्षकाची नोकरी जणू बागेतला थंड प्रवास
हळूच यशाचा मिसळतो सुखावणारा सुवास