खवय्येगिरी

आठवते आज ही मला 

त्या रस्त्यावरून जाताना 

पाणी पुरीचा गोबरा तोबरा 

तोंड लपवून खाताना

 दूरच्या चौकातूनच सुटायचं 

आमच्या तोंडाला पाणी 

गाड्याजवळ पोहोचल्यावर 

आपोआप सुचायची गाणी

गोल गप्पे खाल्ल्यावरचं

कळाली आम्हास खवय्येगिरी 

इकडे तिकडे बघत शेवटी 

हळूच मागायचो मसाला पुरी 

नुसतं आठवलं तरी चव 

जीभेवर अजून रेंगाळते 

पोळी भाजी म्हंटलं तरी 

मन उगीचच पेंगाळते 

चोखंदळपणे जगताना 

करून घेतले जिभेचे चोचले 

दुखावले मनास जरी कोणी 

पाणी पुरी खाऊन सोसले