खिडकी,ती आणि मी

आज सकाळी पुन्हा एकदा

खिडकीत ती दिसली

कटाक्ष टाकून हसत तिने मग

खिडकी बंद करुन घेतली

उगीच आले मनी असे का

वेडी माझ्या प्रेमात पडली

टपली मारुन हळूच डोक्यात

मी त्या विचारांना वेसण घातली

कशात आता लक्ष लागेना

ही कसलीशी नशा चढली

मग तर वाटले ह्या हृदयालाही

तिच्या प्रेमाची भुरळ पडली

थंडीमधल्या टिपूर चांदणी

आता रातही वेडी सजली

सुधाकराच्या मंद प्रकाशी

ती मज ताऱ्यासम भासली

थंड वाऱ्याची एक झुळूक येऊनी

आता डोळी झापडे आली 

पुन्हा सकाळी तिला पाहण्या

अवखळ रातही निद्रिस्थ झाली