कधीतरी हो मोरपीस

मोत्याची सर होऊन

नुसतंच गळ्यात मिरवत

पडून राहण्यापेक्षा 

कधीतरी हो 

यत्किंचित हळुवार तलम मोरपीस

अन् घे अनुभूती स्वच्छंद उडण्याची

वाऱ्यावर स्वार होऊन, घाल गवसणी गगनास

बघ इतके करून प्रयास..!!

पुन्हा अवचित खाली येशील

तेव्हा कदाचित

नकळत पायदळी तुडवली जाशील

किंवा कदाचित

कोणीतरी उचलून घेईल हळुवार

जपेल कोणी मनाच्या पुस्तकात..

अथवा खोविल कोणी कान्हा मस्तकात..!!

इतके मात्र निश्चित

मग तुझे तुलाच कळेल

नाही रंजन काहीच मोत्याच्या मिरवण्यात

खरी गंमत आहे ती

नजाकतीने पिसाच्या उडण्यात..!!