झरा ममतेचा

आई भक्ती शक्ती / वात्सल्य स्वरूप

ईश्वराचे रूप / आई असे ।।१।।

पोटी नऊमास / वागविले खास

साहिलासे त्रास / कितीतरी।।२।।

मायेचा पाझर / प्रेमाचा सागर

सुखाचे आगार / आई माझी।।३।।

तिच्या विना घर / सुने वाटे फार

घराचा आधार / आई थोर ।।४।।

पाहुणे राऊळे / जरी कुणी आले

यंत्रावाणी चाले / धावपळ ।।५।।

पूर्ण घरासाठी / एकटी रांधते

एकत्र बांधते / कुटुंबाला ।।६।।

तिच्या चरणाशी / घडे पुण्य राशी

तेच तीर्थ काशी / माझ्यासाठी ।।७।।

महिमा आईचा / गाता स्तब्ध वाचा

झरा उत्साहाचा / आईपाशी ।।८।।

गायिली संतांनी / आईची कहाणी

'पंडिता'ची वाणी /सांगतसे ।।९।।