इंद्रधनू

निसर्गाच्या पटावर

सप्तरंग उधळीत

अवतरे रविराज

पूर्वदिशा उजळीत ||१||

सोनसळी हे किरण

अंगणात उतरले

सोन पिवळ्या रंगात

दवबिंदू मोहरले ||२||

परसात ताटव्यांना

गोड गुलाबी बहर

सकाळच्या प्रहरात

बहाव्यांचा हा कहर ||३||

रूप खुलले सांजेचे

सतरंगी पदरात

इंद्रधनू लावी गाली

सूर्य लाजला नभात ||४||

पावसाच्या आनंदात

वसुधेस रंग चढे

वस्त्र हिरवे लेऊन

वाजे हर्षाचे चौघडे ||५||

लपंडाव तारकांचा

चाले कसा नभांगणी

चंद्रासंगे रजनी ही

सुखावते तारांगणी ||६||

माझ्या दारास लागले

इंद्रधनुचे तोरण

सूर्य, तारे, चंद्र, वारे

दिले यांस आमंत्रण ||७||

होई जागा मानवा तू

नको करू परिहास

झाडे लावून धरू या

पर्यावरणाची कास ||८||