गुढीपाडवा

मराठी नव वर्षाची

आली चैत्र प्रतिपदा  

सोनपिवळया स्पर्शाची

चैतन्यमयी संपदा

वसंताच्या स्वागतास

पळसफुल मोहरे

सृजनाच्या आनंदात

गुलमोहर बहरे

मराठमोळा जल्लोष

हर्ष नवा वर्ष नवे

प्रेम वाढवू मनात

विसरून हेवेदावे

चैत्राच्या या उन्हामध्ये

बहर हा चैतन्याचा

सण मराठी मनाचा

कलश तो मांगल्याचा

माझे अंगण नटले

दारी तोरण चढले

सुगंधित आनंदाचे

नाविन्यच शिंपडले

पल्लवी उद्याच्या आशा

उंच आभाळी ही गुढी

मनास मिळे उभारी

सोडू मनातील अढी

रेशमी वस्त्र लेऊनी

कडूलिंबाची डहाळी

साखरगाठ माळूनी

आम्रपर्णाची नव्हाळी

आला आला सण आला

गोडव्याचा शिडकावा

नव हर्ष उल्हासाचा

असा हा गुढीपाडवा