गावाकडली जत्रा

जाऊ गावाकडे एकदा

पाहू गावाकडली जत्रा

हौशे गवशे नवशे येती

गावामध्ये भानगडी सत्रा

गाव येरळेच्याच तीरावर

नाथबाबांचे आहे देऊळ

त्याला हे मोठे प्रवेशद्वार

वाटतंय जणू एक राऊळ

मुंबई-पुण्याचे चाकरमानी

जमती या गावच्या जत्रंला

लागतात नाना दुकानं तिथं

सजुन येती लेकीही यात्रंला

कुस्त्या तमाशाचे लागे फड

छंदीफंदी जमतात गावगुंड

बक्षिसांची होतीया खैरात 

आजूबाजूच्या पोरांची झुंड

पालखी फिरता गावातूनी

गुलालखोबरे देती उधळून

माहेरवाशिणी फेडी नवस

नैवेद्य गोडाचाच ओवाळून

लागती दुकानं सत्राशेसाठ

शेवफरसाण कुरमूरे बत्ताशे

पोरीबाळी येती खरेदीसाठी 

पोरं वाजवती पिपाणी ताशे

दोन दिवसांची जंगी जत्रा

चांगभलंचा देती सर्व नारे

पुढल्यावर्षी येऊ फिरून

आठवण घेऊन परते सारे