बुद्ध भीमात पाहिला

आज पुन्हा एकवार 

बुद्ध भीमात पाहिला 

अश्रुपूर्ण लोचनांनी 

श्रद्धाभाव मी वाहिला ||0||

अष्टपैलू ज्ञान ज्याचे 

प्रखर वाणीचा प्रहार 

समाजाला नव्हता कोणी 

असा एक तारणहार 

घणाघाती वक्तव्याने 

स्वाभिमान जागविला 

अश्रुपूर्ण लोचनांनी 

श्रद्धाभाव मी वाहिला ||1||

जगण्यातली तफावत 

त्याने विषद केली अशी 

ठिणगीस देऊन हवा 

आग भडकावी जशी 

मृत मने पेटवून 

त्याने वणवा लाविला 

अश्रुपूर्ण लोचनांनी 

श्रद्धाभाव मी वाहिला ||2||

देव नाही दैव नाही 

तुझे दैव तुझ्या हाती 

शिकून संघटित होऊन 

ज्ञानाच्या लावा वाती 

शिकवून संघर्ष 

दैववाद बघ जाळीला 

अश्रूपूर्ण लोचनांनी 

श्रद्धाभाव मी वाहिला ||3||