बाप

आठवत नाही।मज बाप माझा।

बालपण सजा।अभाग्याला।।१।।

आई माझी माय।आई माता पिता।

खाऊनिया खस्ता। वाढविले।।२।।

प्रत्येक पाऊली। बापाची उणीव।

पोरकी जाणीव। पोखरते।।३।।

खांद्यावर घेतो। बाप फिरवतो।

नेत्रांनी पाहतो।पोरका मी।।४।।

हरपले छत्र। मुकलो बापास।

पितृत्व परिस। नसे मज।।५।।

प्रवेशिलो जेव्हा।विद्या मंदिरात।

शोधला गुरूत। बाप माझा।।६।।

 अतर्क्य कल्पना।कसा जन्मदाता।

संकटात त्राता।कोण मज।।७।।

बापाची प्रतिमा।आधाराचा हात।

वृद्धांना सोबत। देऊनिया।८।।

सदैव अनाथा।पितृछाया द्यावी।

स्मृती हो जपावी ।काळजात।।९।