अत्त दीपो भवः
अत्त दीपो भवः
लक्ष लक्ष तारे उजळवू या धरतीवर
मंदमंद ज्योती तेववू या पणतीवर,
'अत्त दीप भवः', मनी मंत्र धरू खरा,
दीपोत्सव, चला मिळून करू साजरा||धृ||
धन मोठे स्वत्वाचे, ते जतन करू या,
अंतरीच्या लक्ष्मीचा सन्मान स्मरू या,
अष्टलक्ष्मीचे सुस्वागत होईल सर्व घरा,
दीपोत्सव, चला मिळून करू साजरा||१||
रामरूपी ओज जय रावणरूपी तिमिरावर,
धैर्य, शांती, क्षमेने मात होते अधीरावर,
दिव्यतेचा दीप प्रज्वलित होईल हो सत्वरा,
दीपोत्सव, चला मिळून करू साजरा||२||
आतिषबाजी होड दिखाव्याची लागते,
धूर पैशाचा होतो, अन् प्रदूषणही वाढते,
पशू-पक्षी घाबरती, त्या जीवांचा विचार करा,
दीपोत्सव, चला मिळून करू साजरा ||३||
रक्तदान अन् अन्नदानाची शिबिरे उभारू,
गरिबांच्या चुली पेटवू, अश्रू त्यांचे सावरू,
उत्सव पर्यावरणाचा, हा अर्थ जाणा जरा,
दीपोत्सव, चला मिळून करू साजरा||३||