अशी जन्मते कविता

करु मंथन विचार

तरंगत येते मनी

खळबळ काळजात

उमलते शब्दातुनी

प्रसवते ती अशीही

होतो भावना उद्रेक

विचाराचा गोतावळा

येतो बाहेर एकेक

कधी करिते विद्रोह

कधी सांडतो जिव्हाळा

लाव रोप भावनाचे

बहरतो काव्यमळा

अशी माझी ती लाडकी

लहरते जनलोका

समजुन घेण्याचा ती

ठेवी जनापुढे हेका

अचानक तिचे असे

आगमन मनी होते

सृजनाचा सोहळा तो

मम अंगणी होते

तिचे जन्मणे माझ्यात

मोहरते बाईपण

तिच माझ्या हदयातील

जागविते आईपण