अर्थ जीवनाला...

 वेलीस या बघ बहर नवा आला,    

घालतसे साद पुष्प परागाला.   

 विसरू नको रे आपुल्या प्रीतीला.    

 तुजविन नसे अर्थ जीवनाला..... ||धृ ||    

 भास नव्हे ध्यास यावे तू भेटीला,    

 हिरवा शालू तुझ्यासवे घातला .     

कुंतली गजरा मोदे मी माळला ,     

भाव घे रे जाणून नयनातला ..॥ १ ॥    

 दरवळ सुटे स्नेह मोहराला.     

असशील तेथून यावे भेटीला.     

 स्मरुनी मनी आपुल्या वचनाला.    

 दे उजाळा पूर्व स्मृती दलाला..॥ २॥    

 

 बोलाविताच नि:संकोच तू यावे ,      

स्पर्शे यावा आरक्तपणा गालाला .      

प्रेमरसाते ओथंबून स्त्रवावे,      

मोदही मिळावा आसक्त मनाला..॥ ३ ॥  

    

तू येताच ऋतूराजही सजला.      

मुग्ध सरीने रोमांच मत्मनाला .      

धुंद मिलनी एकरूप आत्मा झाला,     

 दिला अर्थ तूची मम जीवनाला. ॥ ४ ॥