आयुष्य घे पणाला

देऊ नको पुरावे आता तरी कुणाला

मानून घे मना तू हारून वास्तवाला

खोटे परी दिखावे असतील या जगाचे

सारेच आपले ते मग राग हा कशाला

दाटून उर येता दे धीर आसवांना

दाऊ नको निराशा किंचितही जगाला

हसतील सारखे हे समजून कोण घेतो

धावून फौज येते दे भार तू खिशाला

जग वेगळे तुझे हे कळणार ना तयांना

तू एकटाच आता आहेस सोबतीला

तोडून बांध सारे कर वाट मोकळी तू

खेचून घे जरासा जवळीक सागराला

एकांत आवडीचा मिळणार ना कधीही

जिंकून दाखवाया आयुष्य घे पणाला