आवडतं मला

आवडतं मला,

 स्वतःवरच निस्वार्थ प्रेम करायला,

 स्वत:लाच भेटण्यासाठी तासंतास झुरायला.

 माझ्यातील मला नव्याने भेटायला.

आवडतं मला, 

स्वतःचीच प्रेयसी होऊन स्वतःतच रममाण व्हायला,

स्वतःशीच भांडून स्वत:वरच चिडायला, 

आणि पुन्हा स्वतःचाच रुसवा घालवायला. 

आवडतं मला, 

स्वतःचीच सखी होऊन स्वतःलाच साथ द्यायला, 

स्वतःवरच जळुन स्वतःचाच तिरस्कार करायला, 

आणि पुन्हा स्वतःलाच हळुवार मिठीत घ्यायला. 

आवडतं मला

स्वतःचाच गोड-गोड कौतुक करायला, 

स्वतःलाच छळ-छळ छळायला, 

आणि पुन्हा स्वतःलाच लाडीकपणे गोंजारायला.

आवडतं मला, 

स्वतःवर निस्वार्थ प्रेम करायला,

माझंच माझ्याशी नवीन नातं जोडायला,

स्वतःच्याच मनात स्वत:ला जपायला.

मनातल्या झुल्यावर अलगद झुलायला.