आई मला हे जग पाहू दे

आई मला हे जग पाहू दे

विनवणी तूला करते आई

नाही लागत मला काही

मला जन्माला येऊ दे

आई मला हे जग पाहू दे.

बनेन तुझी लाडाची लेक

असेल मी लाखात एक,

कल्पना चावला मला होऊ दे

आई मला हे जग पाहू दे.

नाही मिळाले काही जरी

करणार नाही तक्रार तरी,

उपाशी मला तू राहू दे

आई मला हे जग पाहू दे.

जरी मी नसेल घराचा वारस

असेन मात्र नक्कीच पारस

दुःख सावरण्या मला येऊ दे

आई मला हे जग पाहू दे.

नका करू माझा पोटात अंत

बनेन जिजाऊ, मिराबाई संत

रांगेत मला त्या जाऊ दे

आई मला हे जग पाहू दे.

जरी मी असेल इतरांचे धन

जपेन मी सर्वांचे मन,

हास्य मला दोन्ही घरी ठेवू दे

आई मला हे जग पाहू दे...