കോൽ ഐസ് ടു പുട്ട് ഐസ്ക്രീം

ഇതിന്റെ കഥ പറയണമെങ്കിൽ വർഷങ്ങൾക്ക് മുൻപുള്ള കഥ പറയേണ്ടി വരും.. തൊട്ടടുത്ത് ഒരു കോൽ ഐസ് കമ്പനി ഉണ്ടായിരുന്നു.. മിയാമി എന്ന പേരിൽ നടത്തിയിരുന്ന കമ്പനി.. മുന്തിരി, മാങ്ങ, പൈൻ ആപ്പിൾ, പാൽ എന്നിങ്ങനെ പല ഫ്ലാവറുകളിൽ ഒരെണ്ണത്തിന് അഞ്ച് രൂപ വച്ച് കിട്ടിയിരുന്നു..

ഇതിൽ പാൽ ഐസ് ആയിരുന്നു സൂപ്പർ എന്ന് പറയാവുന്നത്.. പായസം പോലെയുള്ള രുചി കിട്ടും.. അതായത് മധുരിക്കും.. എന്ന് വച്ച് ബാക്കിയുള്ളതിന് മധുരമില്ല എന്നല്ല.. അതിനേക്കാൾ കുറച്ചു കൂടെ കൊഴുത്തിരിക്കും.. ക്രീമി എന്നൊക്കെ ഇംഗ്ലീഷിൽ പറയാം.. മറ്റുള്ളവ സത്തു നൽകുന്നത് മാത്രമായിരുന്നു.. എങ്കിൽ കൂടെയും ചൂടുകാലത്തു ഇതിനൊക്കെ ഒരു പ്രത്യേക ഓളമായിരുന്നു.. അതുപോലെ അമ്മമ്മയുടെ വീട്ടിലേക്കൊക്കെ പോകുന്ന സമയത്ത് വഴിയിലുള്ള കടയിൽ നിന്ന് ഓറഞ്ചിന്റെ രണ്ടു രൂപക്ക് കിട്ടുന്ന ചെറിയ സിപ്പപ്പ് കൂട് പൊട്ടിച്ചു വായിലിട്ട് നടന്നത് ഓർമ്മയുണ്ട്.. അവസാനത്തെ നീര് വരെ ഇടത് കയ്യ് കൊണ്ട് ഒരറ്റം മുകളിലോട്ട് പൊക്കി പിടിച്ച് വലത് കൈകൊണ്ട് കവർ അമർത്തി പിടിച്ചു വലിച്ചു വീട് വരെ എത്തിക്കും..അവസാനം ആ കവറിൽ വെള്ളം നിറച്ച് ഒന്നുകിൽ ഈർക്കിലി കൊണ്ട് കുത്തി വെള്ളം ചീറ്റി കളിക്കും.. അല്ലെങ്കിൽ സ്പ്ലാഷ്..

അതവിടെ നിൽക്കട്ടെ.. അങ്ങനെ ഐസിന്റെ വഴികളിലൂടെ സഞ്ചരിക്കുമ്പോൾ എത്തിച്ചേരുന്നത് മറ്റൊരു സ്ഥലത്തേക്കാണ്.. പൂരപറമ്പ്.. കോൺ ഐസ് ക്രീമിൽ നിന്നും തുടങ്ങിയെങ്കിലും ധാരാളം ബന്ധുക്കൾ അവരുടെ കുട്ടികൾ അതായത് കസിനുകൾ എല്ലാവരും കൂടെ ഒന്നിച്ചപ്പോൾ പിന്നീടാ വണ്ടി പതിഞ്ചു രൂപയുടെ ചോക്കോ ബാറിൽ ആണ് വന്നു നിന്നത്.. പുറമേ ചോക്ലേറ്റിന്റെ തോടും അകമേ നിറയെ വാനില ക്രീമും ചേർന്ന മറ്റൊരു സ്പെഷ്യൽ കോൽ ഐസ്. ഇതിന്റെ പങ്കില്ലാതെ പൂരാഘോഷം പൂർണമാക്കാൻ കഴിയില്ല.. അലുവയും പൊരിയും നുറുക്കുമൊക്കെ വഴിയാലേ വരുന്നതാണ്.

അങ്ങനെ വന്നപ്പോളാണ് എട്ടാം ക്ലാസ്സിലെ കുറച്ച് കാര്യങ്ങൾ ഓർമ്മ വരുന്നത്.. എല്ലാം ആഴ്ചയും ശനിയാഴ്ച ഉച്ചക്ക് ട്യൂഷൻ കഴിഞ്ഞ് വരുമ്പോൾ നടന്നിട്ടോ ലിഫ്റ്റ് പിടിച്ചോ ആണ് വീട്ടിലേക്ക് പോവുക.. മിനർവ എന്ന് പേരുള്ള ഈ ട്യൂഷൻ സെന്റർ വീട്ടിൽ നിന്നും രണ്ട് രണ്ടര മൂന്ന് കിലോമീറ്റർ അകലത്തിൽ ആണ്.. അങ്ങനെ കയ്യിലുള്ള ഏഴു രൂപ മിച്ചം പിടിക്കും.. എന്നിട്ട് രണ്ട് രൂപക്ക് മിഠായിയും ബാക്കി അഞ്ച് രൂപക്ക് ബൈപാസിന്റെ വക്കത്തോട് ചേർന്നിട്ടുള്ള മാർജിൻഫ്രീ യിൽ നിന്നും കിട്ടുന്ന വാനില സിപ്പപ്പ് വാങ്ങുന്നത് പതിവാണ്.. ചിലപ്പോഴോക്കെ സ്ട്രോബെറിയോ മംഗോയൊ വാങ്ങിക്കും .. സിപ്പപ്പ് അഞ്ചു രൂപ എന്ന് പറയുമ്പോൾ എന്തെന്ന് വച്ചാൽ സാധാരണ തരത്തിലുള്ള ഐസ് കട്ട അല്ല ഐസ്ക്രീം തന്നെയാണ്.. ഇത് പോലെ അഞ്ചു രൂപക്ക് കിട്ടുന്ന ഒന്നാണ് ഗുൽഫി.. വശം എന്തെന്നാൽ കോൽ ഐസ് പോലെയാണെങ്കിലും കോലിനു മുകളിൽ പല തരത്തിലുള്ള ഫ്‌ളെവറുകളുടെ ക്രീം ഫ്രീസ് ചെയ്ത ഒരു പ്രത്യേക ടൈപ്പ് കോൽ ഐസ് ചുരുക്കി പറഞ്ഞാൽ കോലോട് കൂടെയുള്ള ഐസ്ക്രീം..

പിന്നെ സ്ഥിരമായിട്ടുള്ളതാണ് ബോൾ ഐസ് ക്രീം.. ഇതിന്റെ ഓളം വേറെയാണ്.. ഏറ്റവും കൂടുതൽ ഉന്മേഷം വരുത്തുന്ന ഒന്ന്.. അതായത് കൊണ്ട്. നടക്കാൻ സുഖം.. ഉള്ളിൽ ഒരുപാട് ക്രീം ഉണ്ടാകും.. പോരാഞ്ഞിട്ട് കഴിച്ചു കഴിഞ്ഞാൽ ഉള്ളം കഴുകി കടലാസ് നിറച്ച് അടപ്പ് അടച്ച് ക്രിക്കറ്റും ഏറും കളിക്കാറുണ്ട്.. ഈ കടലാസ് എന്തിനെന്ന് ചോദിച്ചു കഴിഞ്ഞാൽ ബോൾ സിക്സറുകൾ അടിക്കുമ്പോൾ ചുളുങ്ങാതിരിക്കാൻ വേണ്ടിയാണ്.. ബോളുകളുടെ ഒരു ശേഖരം തന്നെ അന്നുണ്ടായിരുന്നു.. നീല, മഞ്ഞ, വയലറ്റ്, പച്ച, ചുവപ്പ്.. ഓരോന്നിന്റെ അടപ്പുകൾക്കും വ്യത്യസ്ത നിറം ആയിരിക്കും..ഗുൽഫിയൊക്കെ ഇതിന് ശേഷം വന്നതാണ്.. വന്നതാകാം..

ഫ്രൂട്ട് സലാഡ് വേനൽക്കാലങ്ങളിലെ മിക്ക കല്യാണറിസപ്ഷനുകളിലും കഴിക്കാൻ കിട്ടുന്ന ഒരു ഐറ്റം ആണ്.. ചില വലിയ വി ഐ പി പരിപാടികളിൽ ആണെങ്കിൽ ഗുലാബ് ജാമോ കേക്കോ കേസരിയോ ചേർത്ത് മിക്സ് ചെയ്ത് തരുന്നതും ഉണ്ട്.. പണ്ടത്തെ പല കൂൾബാർ പരസ്യങ്ങളിലും കാണാവുന്ന ഒന്നാണ് വൈൻ ഗ്ലാസുകൾ പോലെയുള്ള ആഡംബര ഗ്ലാസുകളിൽ ഐസ്ക്രീം കൂന പോലെ നിറച്ച് അതിന് മുകളിൽ ചെറി വച്ചിട്ടുള്ള ചിത്രങ്ങൾ.. എന്നാൽ കാലം മാറുന്നതോടനുസരിച്ച് ഐസ്ക്രീമുകളുടെ രൂപകൽപ്പനകൾക്കും മാറ്റം സംഭവിച്ചു.. പണ്ടത്തെ കോൺ ഐസ് ക്രീമുകളും അഞ്ച് രൂപയുടെ വട്ടപാത്ര ഐസ്ക്രീമുകളും എല്ലാം ഇപ്പോഴും നിലനിൽക്കുന്നെങ്കിലും.. ഇപ്പോൾ അലുമിനിയത്തിന്റെ വർണ്ണകടലാസിൽ പൊതിഞ്ഞ കോൺ ഐസ്ക്രീമുകൾ ഫ്രീസറുകളിൽ നിറഞ്ഞു നിൽക്കുന്നതായി കാണാം.. പണ്ട് തൊട്ടേ ഉള്ള മറ്റൊരു ഐറ്റം ആണ് ഐസ്ക്രീം പെട്ടികൾ അല്ലെങ്കിൽ ടപ്പകൾ.. ഇരുന്നൂറ് ഗ്രാം അഞ്ഞൂറ് ഗ്രാം എന്നിങ്ങനെ തോന കിട്ടുന്നവ..

ഇപ്പോഴത്തെ ട്രെന്റുകൾ പല തരത്തിലാണ്..

 കുറച്ച് കാലം വരെ അവിൽ മിൽക്ക് എന്നത് പഴവും അവിലും തേങ്ങയും ചേർത്തുടച്ചു പാലും ഐസും വെള്ളവും പഞ്ചസാരയും ചേർത്ത് മിശ്രിതമാക്കിയ ഒരു വേനൽക്കാല സൂപ്പർ ഇനം ആയിരുന്നു.. എന്നാൽ ഇന്ന് അത് രൂപവൽക്കരിക്കപ്പെട്ട് പുതുമ നേടിയിരിക്കുന്നു.. അതായത് പല ഫ്ലാവറുകളിൽ ഉള്ള ഐസ്ക്രീമുകൾ ചേർത്തതും പിന്നെ ജെംസും നട്സും അങ്ങനെ പലതും ചേർത്ത് എസ് പി എന്ന പേരിൽ കിട്ടുന്ന പോലെയായി.. അവിൽ മിൽക്കിനായി ഷോപ്പ് റൂമുകൾ വരെ തുടങ്ങി.. അതിന് മുൻപ് വന്നതാകാം ഫലൂദ.. വലിയ ഒരു കുപ്പി ഗ്ലാസിൽ ഐസ്ക്രീമുകൾ നിറച്ച് ചോക്ലേറ്റുകളുടെ കക്ഷണങ്ങളും പിന്നെ ജെംസും നട്സും ചോക്ലേറ്റ് സിറപ്പും പറ്റുമെങ്കിൽ ഫ്രൂട്ട്സും അങ്ങനെ എല്ലാം കുത്തി നിറച്ച്.. മുകളിൽ ചെറിയ സ്പൂണും നിറച്ച് തരുന്ന ഇനം.. അത് ഒന്ന് സ്പൂൺ ഇട്ട് കഴിക്കാൻ നോക്കുമ്പോൾ ആദ്യത്തെ ഭാഗം ഗ്ലാസിന്റെ പുറത്ത് നിന്ന് കഴിക്കണ്ട അവസ്ഥയാകും.. ഗ്ലാസിന്റെ പുറത്തേക്ക് എല്ലാം ഒലിച്ചിറങ്ങി വന്നു കാണും.. പിന്നെ പറയാനുള്ളത് പുട്ട് ഐസ്ക്രീമിനെ കുറിച്ചാണ്.. പറഞ്ഞത് പോലെ ആദ്യം ഇതൊക്കെ കേട്ടപ്പോൾ എനിക്കും അതിശയം തോന്നിയിട്ടുള്ളതാണ്.. പുട്ട് ഐസ്ക്രീമോ പിന്നെയാണ് ഇതിനെ കുറിച്ചൊക്കെ എനിക്കും ഏതാണ്ട് ആശയം വന്നത്.. അതായത് സുഹൃത്തുക്കൾ ഇടുന്ന വാട്സ്ആപ്പ് സ്റ്റാറ്റസുകളിലൂടെ.. കാര്യമായും പെങ്ങൾ ഇടുന്ന സ്റ്റാറ്റസുകളിൽ.. എന്നിട്ട് ഞാനും ഒരു ദിവസം കഴിക്കാൻ പോയി.. ഒരു കുറ്റി പുട്ടിന് 300 രൂപ എന്ന് പറയുമ്പോൾ എങ്ങനെ ഉണ്ടാകും.. എന്നാൽ വിവിധ ഐസ്ക്രീമുകൾ പുട്ടിന് തേങ്ങാപ്പീര് ഇടുന്നത് പോലെ ഇട്ട് കുറച്ച് ചോക്ലേറ്റ് സിറപ്പും നട്സും ജെംസും ചേർത്ത് ആലങ്കരികമാക്കി തരുന്ന ഒരു സാധനം അതാണ് പുട്ട് ഐസ്ക്രീം.. ശരിക്കും പറഞ്ഞാൽ കസിൻസിനെയോ ഫ്രണ്ട്സിനെയോ പോയി പങ്കിട്ട് കഴിക്കേണ്ടതാണ്.. എന്നാൽ അന്ന് ഞാൻ ഒറ്റക്കായതുകൊണ്ട് എന്നോട് ചോദിച്ചു.. ഒരാളല്ലേ അതോണ്ട് ഷോർട് ആക്കിയാലോ എന്ന്.. ആയിക്കോട്ടെ എന്ന് ഞാനും.. അപ്പോൾ അതിന്റെ യഥാർത്ഥ വലിപ്പം എന്തെന്ന് ഇത് വരെ കണ്ടിട്ടില്ല എന്നത് മാത്രം എനിക്ക് കിട്ടിയതാണെങ്കിൽ സാധാ ഒരു കുറ്റി പുട്ടിന്റെ വലിപ്പം ആണ്..

എന്തായാലും കോലിൽ നിന്ന് തുടങ്ങിയ ഐസ് പിന്നെ പുട്ടായി രൂപാന്തരം പ്രാപിച്ചു എന്നതാണ്..