ಪ್ರೀತಿ ಎಂದರೇನು?

ಎಷ್ಟು ಹೊಗಳಿದರೇನು?, ಎಷ್ಟು ಮೆರೆಸಿದರೇನು?,

ಎಷ್ಟು ಸಾರಿ ನಿನಗಿಷ್ಟವಾದುವನ್ನ ತಂದೊಪ್ಪಿಸಿದರೇನು?,

ಕಷ್ಟಗಳ ಒಂದೊಂದಾಗಿ ನೀ ತಂದೊಡ್ಡುತ್ತಿರಲು ಸದಾ

ನಿಷ್ಠೆಯಿಂದ ಎಲ್ಲವನು ಪಾಲಿಸಿಕೊಂಡಿರಲು ಫಲವೇನು?;

ನಿನ್ನೆದುರು ನಾನು ಬರೀ ಶೂನ್ಯವೆಂದು ಒಪ್ಪಿಕೊಳ್ಳುವ ತನಕ,

ನಿನ್ನ ಬಿಟ್ಟು ನನಗೆ ಇನ್ನು ಬದುಕಿಲ್ಲವೆನ್ನುವ ತನಕ,

ನನ್ನ ಇಷ್ಟ ಕಷ್ಟಗಳಾವುದನ್ನೂ ನೀ ಲೆಕ್ಕಿಸದೆ

ನಿನ್ನಿಷ್ಟದಂತೆಯೇ ನೀನಿರಲು ಬಯಸುವುದಾದರೆ

ಪ್ರೀತಿ ಎಂದರೇನು ಎಂಬ ಅರಿವು ನಿನಗೆ ಕಿಂಚಿತ್ತಾದರೂ

ಇರಲು ಸಾಧ್ಯವೇ ಇಲ್ಲವೆಂದು ಸಾಬೀತಾದಂತಲ್ಲವೇ?;

ನೀ ಹೇಗಿದ್ದರೂ ನಿನ್ನ ನಾನು ಪ್ರೀತಿಸುವೆನೆಂದು ಹೇಳಿದರೂ

ನಿನ್ನಂತೆಯೇ ಅನ್ಯರನ್ನೂ ನಾನು ಪ್ರೀತಿಸಬಾರದೆಂದು

ಮತ್ತೆ ಏಕೆ ನನ್ನ ಮೇಲೆ ನಿರ್ಬಂಧವನೇರುವೆ?

ಪ್ರೀತಿಯ ನೆಪದಲ್ಲಿ ಏನು ಮಾಡಿದರೂ, ಹೇಗಿದ್ದರೂ

ಎಲ್ಲವೂ ತಪ್ಪಾಗಿ ಪರಿಣಮಿಸುತ್ತಿರಲು ಕೊನೆಗೆ 

ಪ್ರೀತಿಯೆಂದರೇನು ಎಂದು ನನ್ನನ್ನೇ ಪ್ರಶ್ನಿಸುವಂತಾಯಿತು.